នាថ្ងៃទី ៩ ខែធ្នូ លោក Li Qiang នាយករដ្ឋមន្ត្រីចិនបានបើកធ្វើកិច្ចប្រជុំសន្ទនា "១+១០" ជាមួយប្រធានធនាគារអភិវឌ្ឍន៍ថ្មី ប្រធានធនាគារពិភពលោក ប្រធានមូលនិធិរូបិយវត្ថុអន្តរជាតិ អគ្គនាយកអង្គការពាណិជ្ជកម្មពិភពលោក និងអ្នកទទួលខុសត្រូវនៃអង្គការសេដ្ឋកិច្ចអន្តរជាតិធំៗជាច្រើននៅសណ្ឋាគាររដ្ឋ Diaoyutai នៅទីក្រុងប៉េកាំង ដើម្បីធ្វើការផ្លាស់ប្តូរមតិយោបល់យ៉ាងស៊ីជម្រៅជុំវិញប្រធានបទ "ប្រមូលផ្តុំគំនិតឯកភាពរួមស្តីពីការអភិវឌ្ឍ ជំរុញវិបុលភាពរួមសកល"។ លោក Li Qiang បានលើកឡើងថា ភាគីទាំងអស់គួរតែផ្តោតការយកចិត្តទុកដាក់បន្ថែមទៀតលើការអភិវឌ្ឍ រួមគ្នាបង្កបរិយាកាសអភិវឌ្ឍន៍ប្រកបដោយសន្តិភាព និងស្ថិរភាព លើកកម្ពស់កម្រិតអភិបាលកិច្ចសកល រក្សាស្ថិរភាពនិងភាពរលូននៃខ្សែសង្វាក់ផលិតកម្ម និងខ្សែសង្វាក់ផ្គត់ផ្គង់សកល ព្រមទាំងពូនជ្រំកម្លាំងចលករថ្មីសម្រាប់កំណើនសេដ្ឋកិច្ច។ អ្នកទទួលខុសត្រូវនៃអង្គការសេដ្ឋកិច្ចអន្តរជាតិនានាបានកោតសរសើរខ្ពស់ចំពោះសមិទ្ធផលដ៏អស្ចារ្យរបស់ប្រទេសចិនក្នុងការអភិវឌ្ឍ ដោយបានថ្លែងថា សេដ្ឋកិច្ចរបស់ប្រទេសចិននៅតែបន្តមាននិន្នាការល្អប្រសើរ ប្រកាន់ខ្ជាប់នូវការបើកចំហចំពោះក្រៅប្រទេសក្នុងកម្រិតខ្ពស់ ក៏ដូចជាចាក់បញ្ចូលស្ថិរភាពដ៏មានតម្លៃ និងកម្លាំងចលករដ៏ខ្លាំងក្លាសម្រាប់សន្តិភាព និងការអភិវឌ្ឍរបស់ពិភពលោក តំណាងគ្រប់រូបមានទំនុកចិត្តយ៉ាងខ្លាំងចំពោះការធ្វើបរិវត្តកម្មនិងអនាគតនៃសេដ្ឋកិច្ចចិន។ បណ្តាភាគីនានាមានឆន្ទៈក្នុងការពង្រឹងកិច្ចសហប្រតិបត្តិការជាមួយប្រទេសចិន រួមគ្នាគាំពារពហុភាគីនិយម និងដំណើរការសកលភាវូបនីយកម្ម ផ្តល់អាទិភាពចំពោះការអភិវឌ្ឍ ប្រកាន់ខ្ជាប់នូវពាណិជ្ជកម្មសេរី បង្កើនការគាំទ្រដល់ប្រទេសកំពុងអភិវឌ្ឍន៍ ឆ្លើយតបនឹងបញ្ហាបម្រែបម្រួលអាកាសធាតុនិងបញ្ហាប្រឈមជាសកលផ្សេងទៀត ជំរុញកំណើនសេដ្ឋកិច្ចពិភពលោកប្រកបដោយបរិយាបន្ន សំដៅជំរុញវិបុលភាពរួម និងការអភិវឌ្ឍប្រកបដោយចីរភាព៕