ចាំទេ! លី អ៊ីវ៉ាធីណា ទម្លាយអតីតកាលកន្លែងច្រៀង១ថ្ងៃរកបានត្រឹម៣ដុល្លារ
រាជធានីភ្នំពេញ ៖ មិនណយដែរ ដើមឆ្នាំ២០០០ កញ្ញា លី អ៊ីវ៉ាធីណា លេងខ្លួនមួយទំហឹង ខោខូវប៊យ អាវយឺត សំពត់ខើច គឺថា លេងខ្លួនអស់ទាស់តែម្ដង ដោយតារាចម្រៀងកូនកាត់ចិន សំឡេងផ្អែមរូបនេះ បងប្អូនអ្នកគាំទ្រអាចនឹងស្គាល់ ហើយកាលពីពេលថ្មីៗនេះ កញ្ញា ក៏បានទម្លាយអតីតកាលរបស់ខ្លួនច្រៀងមួយថ្ងៃរកបានត្រឹម៣ដុល្លារប៉ុណ្ណោះ ជាភាសាខ្មែរ និងចិន ហើយក៏ជាពេលមួយដែលកញ្ញាបានត្រៀមចូលសិល្បៈផងដែរ។
តាមរយៈសំណេរដែលកញ្ញាបានបង្ហោះ ក៏ដូចជាភ្ជាប់ជាមួយរូបថត នេះបានប្រាប់ឱ្យដឹងថា « កន្លែងនេះហើយ… ជាកន្លែងដែល ចេចេ ចាប់ផ្តើមច្រៀងដំបូងគេ… មួយថ្ងៃបានតែ៣ដុល្លារទេ… ច្រៀងខ្មែរ និងចិន…»។
ជាការពិតណាស់ អនុស្សាវរីយ៍ពេលនោះ អាចថា គឺជាការចងចាំដ៏ល្អចំពោះតារាស្រីរូបនេះ ដែលខ្លួនមានភាពក្លាហាន ហ៊ានកាន់ក្បាលមេក្រូច្រៀង សំខាន់សម្លៀកបំពាក់ពេលនោះស្រស់ឆើតឆាយមិនធម្មតា ទោះច្រៀងមួយថ្ងៃបាន៣ដុល្លារក៏ដោយ។
តើបងប្អូនស្គាល់ទេថា កន្លែងណាដែលល្បីជាងគេកាលពីជំនាន់ឆ្នាំ២០០០នោះ? ដោយរូបភាពប៉ុន្មានសន្លឹក កញ្ញា លី អ៊ីវ៉ាធីណា បានបង្ហើបឱ្យដឹងថា ខ្ទង់ឆ្នាំ២០០២ ដែលកញ្ញានៅក្មេងខ្ចីតែម្ដង។
តាមរយៈសម្ភាសន៍ជាមួយសារព័ត៌មានកោះសន្តិភាព កញ្ញា លី អ៊ីវ៉ាធីណា ដែលជាតារាចម្រៀងកូនកាត់ចិន បានប្រាប់ឱ្យដឹងថា «កន្លែងដែលកញ្ញាបានច្រៀងនោះ គឺនៅមជ្ឈមណ្ឌល «ផាកវេ» ដោយកាលនោះ ខ្ទង់ឆ្នាំ២០០២។ ហើយកញ្ញាក៏មានការកោតសរសើរពីម្ចាស់ហាងផងដែរថា ពូកែច្រៀង ដោយអាចច្រៀងជាភាសាខ្មែរ និងចិន ហើយថែមទាំងពូកែរាំថែមទៀតផង ដោយកាលនោះ ម្តាយកញ្ញាគឺជាអ្នកលក់ផ្កានៅម្តុំផាកវេ ដែលកញ្ញាច្រៀងនោះតែម្ដង»។
កញ្ញា លី អ៊ីវ៉ាធីណា បានបន្តថា «លុះក្រោយមក ឆ្នាំ២០០៣ កញ្ញាក៏បានចូលច្រៀងឱ្យផលិតកម្ម «រស្មីស្ទឹងសង្ហែ» ជាមួយតារាចម្រៀងប្រុសស្រីល្បីជាច្រើនដួង»។
នៅពេលមានការចោទជាសំណួរថា តើកញ្ញាអាចនឹងបោះបង់សិល្បៈឬទេ? ព្រោះបច្ចុប្បន្ន ឃើញដូចជាមមាញឹកជាមួយការរកស៊ីថ្មី?
កញ្ញា លី អ៊ីវ៉ាធីណា បាននិយាយថា «មិនបោះបង់សិល្បៈនោះឡើយ ពោលគឺឱ្យតែមានការអញ្ជើញកញ្ញាឱ្យច្រៀង កញ្ញានឹងទៅ ទោះបីជានាពេលបច្ចុប្បន្ននេះ កញ្ញាមមាញឹកជាមួយការបើកហាងក៏ដោយ»។
លើសពីនេះ កញ្ញា លី អ៊ីវ៉ាធីណា បន្ថែមថា «កញ្ញានាពេលបច្ចុប្បន្ន ក៏បានច្រៀងឡើងវិញបទចាស់ៗរបស់កញ្ញាផ្ទាល់ ក៏ដូចជាចម្រៀងជាភាសាចិនមួយ ដែលកាន់តែខិតជិតមកដល់នេះផងដែរ»។
គួរបញ្ជាក់ផងដែរថា រាល់រូបភាពទាំងអស់នេះ បងប្អូនមហាជនអាចនឹងមានអនុស្សវរីយ៍ច្រើន ជាមួយបទចម្រៀងរបស់តារាស្រីស្រស់កូនកាត់ចិនរូបនេះ បើទោះបីជាមមាញឹកយ៉ាងណាក៏ដោយ ក៏កញ្ញានៅតែវត្តមានជាមួយសិល្បៈជានិច្ចជាកាលផងដែរ៕
អត្ថបទដោយ៖ WIN WIN News Media
