អ្នកនាង ដេនី ក្វាន់ ក្ដៅស្លឹកត្រចៀកចេញមុខការពារកូនស្រី រឿងក្មេងស្រីរួមថ្នាក់និយាយដើមមិនល្អ (វីដេអូ)
រាជធានីភ្នំពេញ ៖ អ្នកនាង ដេនី ក្វាន់ បានចេញមុខប្រឆាំងទាស់ ដើម្បីការពារកូនស្រី ល្អ ហួស ក្រោយពីមានការបែកធ្លាយសារសំឡេងរបស់ក្មេងស្រីរួមថ្នាក់និយាយដើមមិនល្អមកលើកូនស្រីរបស់ខ្លួន ខណៈពេលដែលអ្នកនាងចាត់ទុកករណីនេះ គឺជាការបរិ.ហា.រកេរ្តិ៍មកលើកូនស្រីរបស់នាងយ៉ាងធ្ងន់ធ្ងរ ។
តាមរយៈសារសំឡេងដែលត្រូវបានទម្លាយដោយអ្នកនាង ដេនី ក្វាន់ នោះ បានបង្ហាញថា «កូនសិស្សរួមសាលារបស់ស្រីស្អាត ល្អ ហួស បានជជែកគ្នាតាមគ្រុបបែបរិះគន់ ដោយលើកឡើងពីស្រីស្អាត ល្អ ហួស ថា មិនល្អ ជាស្រីទាក់ប្រុស និងនៅក្រៅមិនស្អាត ជាដើម ។ល។»
តាមរយៈពាក្យសម្តីទាំងនេះ បានធ្វើឱ្យអ្នកនាង ដេនី ក្វាន់ ហាក់ក្ដៅស្លឹកត្រចៀក ដោយអ្នកនាងបានបញ្ចេញសារបង្ហោះតាមបណ្តាញសង្គមថា «ប្រាប់ហើយថា កូនខ្ញុំហាមប៉ះ ត្រៀមខ្លួនទៅ ក្ដៅដូចបាយពុះ តើនរណាជាអាណាព្យាបាលរបស់ក្មួយស្រីម្នាក់នេះ? ក្មួយស្រីម្នាក់នេះសំដីសា.ហា.វ ហៅគ្រូបង្រៀនសុទ្ធតែ មី មី ហើយនិយាយថា កូនស្រី ល្អ ហួស របស់ខ្ញុំទៅរៀនទាក់ប្រុស តើរាល់ថ្ងៃទៅរៀន ឬទៅបរិ.ហា.រកេរ្តិ៍កូនស្រីខ្ញុំ? តើសាលាគួរចាត់វិធានការបែបណាជាមួយសិស្សប្រភេទនេះ?»។
ដោយឡែក នៅក្នុងវីដេអូដែលបាន Live អ្នកនាង ដេនី ក្វាន់ បានលើកឡើងបន្ថែមថា «ខ្ញុំចង់ប្រាប់ទៅក្មួយស្រីដែលបាននិយាយនោះថា ខ្ញុំខំរកលុយ ដើម្បីបញ្ជូនកូនទៅរៀន មិនមែនទៅទាក់ប្រុសទេ ហេតុអ្វីក៏ក្មួយដឹង? បើក្មួយនៅក្មេងសោះ» ។
អ្នកនាងបន្តថា «ខ្ញុំចង់ដឹង ខាងសាលាមានចំណាត់ការបែបណាចំពោះរឿងនេះ សូម្បីតែគ្រូក៏គាត់ហៅមីដែរ ចុះទម្រាំកូនខ្ញុំ អ៊ីចឹងខ្ញុំស្នើទៅសាលាសូមជួយពិនិត្យរឿងនេះឡើងវិញ ឬក៏យកគាត់ទៅអប់រំ ព្រោះអាណាព្យាបាលបញ្ជូនគាត់ទៅរៀនឱ្យចេញដឹង មិនមែនទៅនិយាយបរិ.ហា.រកេរ្តិ៍ទេ»។
អ្នកនាងបញ្ជាក់ថា «ប្រសិនបើសាលាមិនមានចំណាត់ការចំពោះរឿងនេះទេ ខ្ញុំនឹងបញ្ឈប់កូនស្រីមិនឱ្យទៅរៀននៅសាលាមួយនេះទៀតទេ ប៉ុន្តែខ្ញុំជឿថា សាលាមួយៗប្រាកដជាមានច្បាប់ និងវិន័យ»។
យ៉ាងណាម៉ិញ បើតាមអ្នកនាង ដេនី ក្វាន់ រហូតមកទល់នាពេលនេះ អ្នកនាងមិនមានគោលបំណងណាមួយពាក់ព័ន្ធចំណាត់ការទៅលើផ្នែកច្បាប់នោះឡើយ ដោយសារអ្នកនាងគិតថា ក្មេងអាយុប៉ុណ្ណឹង គឺស្ថិតនៅក្រោមការគ្រប់គ្រងពីអាណាព្យាបាល ប៉ុន្តែអ្នកនាងចង់ឱ្យអាណាព្យាបាលក្មេងស្រីទាំងនោះ គួរចំណាយពេលវេលាខ្លះ ដើម្បីទូន្មានប្រៀនប្រដៅកូនឱ្យបានល្អជាងនេះ ។
ទោះបីជាយ៉ាងណា អ្នកនាងបញ្ជាក់ថា «នាងមិនចង់បន្តរឿងនេះឱ្យវែងឆ្ងាយ ឬចង់បង្ខូចឈ្មោះជាមួយក្មេងនោះឡើយ ប៉ុន្តែរឿងនេះ វាពិបាកទទួលយកណាស់ ហើយវាក៏បានធ្វើឱ្យប៉ះពាល់ដល់អារម្មណ៍អ្នកនាងជាម្តាយ និងកូនស្រី ល្អ ហួស យ៉ាងខ្លាំង ក្នុងពេលដែលកូនស្រីរបស់នាងកំពុងតែហ្វឹកហាត់យ៉ាងខ្លាំងសម្រាប់ការចេញទៅប្រកួតសម្រស់មួយ តំណាងកម្ពុជានៅលើឆាកអន្តរជាតិនាពេលឆាប់ៗខាងមុខនេះ»៕
អត្ថបទដោយ៖ WIN WIN News Media
