ភ្នំពេញ៖ នៅថ្ងៃទី ២០ ខែ តុលា ឆ្នាំ ២០២៤ ក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ មានមោទកភាព ប្រកាសពីការបញ្ចប់ព្រឹត្តិការណ៍ «ជិះកង់ដើម្បីជួយកុមារកម្ពុជាឆ្នាំ២០២៤» ប្រកបដោយភាពជោគជ័យនៅទីក្រុងកោះពេជ្រ​ នឹង​ទីក្រុងនរា រាជធានីភ្នំពេញ ក្នុងគោលបំណងស្វែងរកថវិកាក្នុងការជួយឧបត្ថម្ភដល់កុមារកម្ពុជាដែលកំពុងខ្វះខាត។

ក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ បានរៀបចំព្រឹត្តិការណ៍ជិះកង់នេះធ្វើឡើងជាលើកទី៣ ឆ្នាំ២០២៤ នៅរាជធានីភ្នំពេញដែលមានទីតាំងនៅខាងមុខអគារ Elysee កោះពេជ្រ​​ និង ទីក្រុងនរា នាព្រឹកថ្ងៃទី២០ ខែតុលា ឆ្នាំ២០២៤ បង្កឱ្យមានភាពសប្បាយរីករាយ និងមានការចូលរួមគាំទ្រពីវិស័យឯកជន ម្ចាស់ក្រុមហ៊ុន សហគ្រាសជាច្រើន ដើម្បីប្រមូលថវិកាជួយដល់ការសិក្សារបស់កុមារកម្ពុជា។

តំណាងក្រុមហ៊ុនសហការជាច្រើន បានកត់សម្គាល់ដោយសង្កត់ធ្ងន់លើតួនាទីនៃការជិះកង់ក្នុងការលើកកម្ពស់របៀបរស់នៅប្រកបដោយនិរន្តរភាព និងប្រកបដោយសុខភាព «យើងមិនត្រឹមតែមកជួបជុំគ្នានៅទីនេះសម្រាប់ការហាត់ប្រាណប៉ុណ្ណោះទេ ប៉ុន្ដែយើងកំពុងចូលរួមដើម្បីជួយដល់កុមារា-កុមារីកម្ពុជា ដើម្បីការសិក្សារៀនសូត្ររបស់ពួកគេ»។

ទិដ្ឋភាពនាពេលព្រឹកព្រលឹមបានបង្ហាញពីវត្ដមានអ្នកចូលរួមជាច្រើននាក់ ទាំងក្មេងទាំងចាស់ពាក់អាវយឺតពណ៌ផ្កាឈូក ដែលមាននិមិត្តសញ្ញា«សុវណ្ណាភូមិ ឡាយហ្វ៍»ដោយបង្កើតបរិយាកាសរីករាយនឹងការជិះរួមគ្នា និងបង្ហាញសាររីករាយទៅកាន់មនុស្សគ្រប់ៗគ្នា។

ព្រឹត្តិការណ៍នេះទទួលបានជោគជ័យយ៉ាងខ្លាំង ដោយមានអ្នកចូលរួមជិះកង់ ប្រមាណជាង ៥០០ នាក់ ក្នុងសកម្មភាពសប្បុរសធម៌នេះ។ ទន្ទឹមនឹងនេះ សុវណ្ណាភូមិ ឡាយហ្វ៍ ក៏សូមថ្លែងអំណរគុណយ៉ាងជ្រាលជ្រៅចំពោះការចូលរួមឧបត្ថម្ភធំពីក្រុមហ៊ុនជាច្រើនដូចជា ក្រុមហ៊ុនវិនិយោគទុនអាណិកជនកម្ពុជា(OCIC) ទីក្រុងកោះពេជ្រ ខុនដូ ដាយមិន បេ ហ្គាដិន មន្ទីរពេទ្យអ៊ីនធ័រឃែរ ទីក្រុងនរាធនាគារកាណាឌីយ៉ា សណ្ឋាគារតារា សាលាអន្តរជាតិកាណាដាភ្នំពេញ ក្រុមហ៊ុនវ៉តឆ៍ អេមផាយ ខូ អិលធីឌី (ice watch) ធនាគារ អេស ប៊ី អាយ លី ហួរ សាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា(ខេមតិច)ដឺ បេស ខេមើរ៉ា ឡាយ ប៉ូការី ស្វេត (Pocari Sweat) តាដា (TADA) ដឹអូឡាំព្យាស៊ីធី និងក្រុមហ៊ុនផ្សេងៗជាច្រើនទៀត សម្រាប់ការគាំទ្រដ៏សប្បុរសក្នុងព្រឹត្តិការណ៍នេះ។ សុវណ្ណាភូមិ ឡាយហ្វ៍ សូមថ្លែងអំណរគុណយ៉ាងជ្រាលជ្រៅចំពោះគណៈគ្រប់គ្រងទីក្រុងកោះពេជ្រដែលបានផ្តល់ទីតាំងសម្រាប់រៀបចំព្រឹត្តិការណ៍ និងដៃគូប្រព័ន្ធផ្សព្វផ្សាយដូចជា CBS PNN AMS APSARA TV11 TNAOTApp The Nation Cambodia Win Win News និងស៊ីស៊ី ថាមស៍ (The Cambodia China Times) ដែលបានចូលរួមជាដៃគូផ្សព្វផ្សាយផងដែរ។

 ថវិកាជាសាច់ប្រាក់សរុប ដែលបានប្រមូលពីម្ចាស់ឧបត្ថម្ភទាំងអស់មានចំនួន ៥​,៥០០ដុល្លារអាមេរិក ព្រមទាំងទទួលបានសម្ភារមួយចំនួនផងដែរ ហើយចំនួនទឹកប្រាក់ និងសម្ភារទាំងអស់ដែលទទួលបានពីកម្មវិធីសប្បុរសធម៌នេះនឹងត្រូវបរិច្ចាគដល់កុមារកម្ពុជាដែលខ្វះខាត តាមរយៈ អង្គការដៃគូ និងសាលាបឋមសិក្សាសាធារណៈ។

ក្នុងអំឡុងពេលនៃព្រឹត្តិការណ៍ លោក Loke Kah Meng អគ្គនាយកប្រតិបត្តិ ក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ បានថ្លែងពីសារៈសំខាន់នៃការគាំទ្រដល់កុមារកម្ពុជាដោយលោកបានមានប្រសាសន៍ថា៖ «យើងមានមោទកភាពក្នុងការរៀបចំព្រឹត្តិការណ៍នេះជារៀងរាល់ឆ្នាំនិងចូលរួមចំណែកធ្វើឱ្យប្រសើរឡើងនៃសង្គមជាតិរបស់យើង។ យើងជឿជាក់ថា កុមារគ្រប់ៗរូបគួរមានឱកាសដើម្បីទទួលបានភាពជោគជ័យក្នុងជីវិត ហើយយើងក៏បានប្តេជ្ញានឹងជួយជ្រោមជ្រែងដល់កុមារកម្ពុជាឱ្យសម្រេចបាននូវភាពជោគជ័យផងដែរ»។  លោកបានបន្ថែមថា «យើងសង្ឃឹមថាព្រឹត្តិការណ៍នេះនឹងជម្រុញ ក៏ដូចជាលើកទឹកចិត្តដល់ភាគីគ្រប់រូបឱ្យមានការចូលរួមចំណែកកាន់តែច្រើន ដើម្បីឆ្ពោះទៅមុខក្នុងការកសាងអនាគតដ៏ល្អប្រសើរសម្រាប់កុមារកម្ពុជា»។

ក្រុមហ៊ុនធានារ៉ាប់រងអាយុជីវិត សុវណ្ណាភូមិ ឡាយហ្វ៍ បានរៀបចំកម្មវិធីជិះកង់សប្បុរសធម៌ដោយជោគជ័យក្នុងឆ្នាំ ២០២២។ កម្មវិធីជិះកង់សប្បុរសធម៌ដើម្បីកុមារកម្ពុជាសម្រាប់ឆ្នាំ ២០២៣ គឺជាជោគជ័យដ៏អស្ចារ្យ ដោយមានការគាំទ្រពីម្ចាស់ឧបត្ថម្ភ និងអ្នកចូលរួមជិះកង់ជាច្រើនផងដែរ។ ក្រុមហ៊ុន សុវណ្ណាភូមិ ឡាយហ្វ៍ នឹងរៀបចំព្រឹត្តិការណ៍កីឡាបន្ថែមទៀតនាពេលអនាគត និងបន្តកិច្ចខិតខំប្រឹងប្រែងដើម្បីធ្វើឱ្យសង្គមជាតិកាន់​តែប្រសើរឡើង។

ក្រុមហ៊ុន​ធានា​រ៉ាប់រង​អាយុ​ជីវិត សុវណ្ណាភូមិ ឡាយហ្វ៍ អឹសួរ៉ិនស៍ ភីអិលស៊ី គឺ​ជា​ក្រុមហ៊ុន​បុត្រសម្ព័ន្ធ​របស់​ក្រុមហ៊ុន កាណាឌីយ៉ា អ៊ិនវេសមេន ហូលឌីង ដែល​មាន​ទ្រព្យ​សម្បត្តិ​សរុប​ជាង ៨.៨ ពាន់​លាន​ដុល្លារ​អាមេរិក និង​ជា​កេរ្តិ៍​ដំណែល​តាំង​ពី​ឆ្នាំ ១៩៩១។ ក្រុមហ៊ុន សុវណ្ណាភូមិ ឡាយហ្វ៍ ជា​ក្រុមហ៊ុន​ដែល​មាន​មូលដ្ឋាន​ហិរញ្ញវត្ថុ​រឹងមាំ និងទំនុក​ចិត្តព្រម​ទាំង​ទទួល​បាន​ពាន​រង្វាន់ ៤ ឆ្នាំ​ជាប់​គ្នា ជា​ក្រុមហ៊ុន​ធានា​រ៉ាប់រង​អាយុ​ជីវិត​រីកចម្រើន​លឿន​បំផុត​នៅ​កម្ពុជា​ក្នុង​ឆ្នាំ ២០១៨ ២០១៩ ២០២០ និង ២០២១ ផ្តល់​ដោយ​ក្រុមហ៊ុន The Global Banking and Finance Review ដែល​មាន​ទីស្នាក់ការ​កណ្តាល​នៅ​ទីក្រុង​ឡុងដ៍ នៃ​ចក្រភព​អង់គ្លេស​ និង​ពាន​រង្វាន់​ក្រុមហ៊ុន​ធានា​រ៉ាប់រង​អាយុ​ជីវិត​ដែល​មាន​ភាព​ច្នៃ​ប្រឌិត​ជាង​គេ​នៅ​កម្ពុជា​ឆ្នាំ ២០២១ ផ្តល់​ដោយ​ស្ថាប័ន International Business Magazine ដែល​មាន​ទីស្នាក់ការ​នៅ​សហព័ន្ធ​អារ៉ាប់រួម៕